Ode aan de melkbus
Ode aan de melkbus
Fotoonderschrift: De melkbussen worden bij de melkfabriek van de wagen gehaald en op de band geplaatst.
Ode aan de melkbus
Noa ’n roerig bestoan, is de melkbus van ’t arf goan,
No is dat neet zo vulle bijzunders, reken d’r op, doar geet nog meer
In dizzen tied van steeds meer bunder, al dut mennigen boer dat zeer
Iej zult wal denken dak begin te jokken, tis ok wal een betje gek
‘k wun deur een melkbusse an e sprokken Wij kreegn zowaar een heel gesprek
Hee zeg : in heel mien bestoan, heft ter nog nooit zo raar an too e goan
Altied was ik in de weer, en dee dat met vulle plezeer
In weer en wind – warm of koold, versjouwen ik ’t witte goold
Van Bertha- Bontje – Geesje of Riek, van de boern noar de melkfabriek
‘k veuln dan hoe ze mi’j bi’j de oorn pakken, en op de bolderwagen smakken
Met vulle gerammel ginge wie dan met zien aln op ’t dorp an, bi’j de fabriek kwam i’j op de lange band,
Tut daj bi’j de schoale wann an e laand, doar stutn ze ow dan overn kop
En den weeger schreef de liters op,
Bi’j kleen boer stun ik alleen, behalve ’s moandags dan met zien tweeën
Bi’j nen grotn boer: doar kont neet op, En stonnen wi’j met ne hele trop
Mostn ze wal is wat bi’j mekare ingeetn, dan gin warm bie’j koold
Want dat leet de fabriek oe weetn, dan bedorf dat witte goold
Den melkboer vond half ok niks an, dat bracht gen overliters an
Terugge ginge wi’j weer noar den boer, met ant deksel een breefke : zoer
Dan pakn den boer ou lomp , en guet ou leug in varkenszomp
Weg was dan dat witte nat, reken der op dat ’t vaarken zich dan dretterig vrat
Wi’j wann de trots van de boerin, en had zee een hele goeje zin
Dan schoern ze zo had da’j ’t hoast neet konn lien, totda’j glimn as nen hoondköttel in de moaneschien
A’j dan op ’t hekke hingn te druegn, dan ging ze visite neugn
Want zo’n riege op ’t rek, dat leek lang niet gek
Noe is dat alles neet neudig meer, want Coberco kwam in de weer
De adviseern met vulle vuur, de melkbusse wudt vul te deur
Ma dan ist nog neet op e lost, ne aandern zeg dat den tank te vulle kost
Al met al bink nog lange neet versletn, en mok mi’j inn hook van de schöppe loatn zetn
Joa, soms in een eenkel geval, kump der eene bi’j de boerin in de hal
Doar stoaj dan een betjen verleegn, net good genog um ne bloome te dreagn
Of ne waandelstok, een krom stuk hoolt, mer nooit meer het witte goold
Och wat dut mi’j dat verdreet, ma dat is nog het argste neet
’t Argste, doar wik mi’j oaver beklaagn, dan goaj bie’jn old iezer keerl op de waagn
Doarnoa; iej geleuft het amper, goaw in ne grootn stamper
Tusken ooale auto’s goaw dan, Noe op de blikfabriek an
Mag ik nog eene wens slaken, loat miej dan neet tot vleesblikken maken
Want op dee dinge wordt e scholden, dat is gewoon neet oet te holden
‘k Begriepe wel mien tied is zowat veurbiej, maar denk toch nog ’s an mie’j
Want den veertig litersen dee joar en dag, Ok in Wierden welvaart hef e brag.
Locatie: | NL |